Arazo-egoeratik Unitate Didaktiko-digitala diseinatzera

 Hirugarren bloke honetan, arazo-egoeratik unitate didaktiko-digitala diseinatzea da oraingo honetan egin behar izan duguna. DBHko 4. mailarako edo Batxilergorako baliagarria den bat osatu dut nik.

Antzeko ataza bat egin izan dut nire ikasleekin, nahiz eta planteamendua ez izan berbera, baina arrakasta izan zuenez, gai bera lantzea bururatu zitzaidan egin beharrekoa zein zen ikusitakoan.

Euskara gertuko gaia da guztiontzat, baina askotan gertutasun horrek beldurra eta konfiantza falta sortzen du hiztunengan. Zenbat aldiz entzun behar izan ditugu, batez ere gure inguruko adinekoen berbetan honelako esanak: “Nik ez dakit oso ondo euskaraz; nire euskara ez da batere ona; gaur egungo gazteok bai badakizuela ondo berbetan; Tolosakoena, haiena bai hizkuntza ederra eta garbia…”

 

Konplexuz betetako herrian bizi gara eta horri buelta emateko garaia da. Euskarak dakarkiguna eskertzea, eta gaiarekiko jakin-mina sorraraztea da helburua. Beronen aniztasuna ezagutzea eta estimatzea. Hau da, kontzientziazioa. Honelako unitate didaktiko batek ikuspegi konstruktibista izan behar du oinarrian, ikasleak jarrera positiboa izan dezan, parte hartze aktiboaz.

Euskara eta Literatura irakasgaia oso egokia iruditzen zait proiektu bidez lantzeko, ikasleen parte hartzea ahalbidetu eta ziurtatu dezakegulako. Baina orain arteko esperientzian oinarrituta esan dezaket, nahi izatea eta ahal izatea ez datozela beti bat. Ordezko irakasleak nahiko lotuta egoten gara egin beharrekoetara, aurrez zehaztuta egoten delako zer eta zelan egin behar den eta zoritxarrez, irakasleon arteko adostasun eta batasun falta nabariak dira. Maila berean ikasgai bera irakasle batek baino gehiagok eman behar duenean, koordinazio minimo bat egotea komeni da eta gaia zelan landu behar den ere adostu behar da irakasleen artean. Adostasun hori lortzea ez da beti posible, batzuk gurago dutelako betiko eran egin, dena prestatuta dutelako eta ez dutelako lan edo esfortzu gehigarri bat egin; erronka interesgarri bat izan barik, askorentzat karga hutsa baita. Esate baterako, irakasle batek modu interaktiboagoan landuz gero ondoko gelakoek landu behar duten gai berbera, ikasleak laster hasiko dira kexuka eta azalpen eske normala den moduan.

Ahotsak ikasgelan webgunean badago gai hau lantzeko baliagarria den ariketa. Honako hau oinarritzat hartuta planteatuko nieke nik osatutako unitatea.